Choose another map, showing:

• Germany
• France
• Italy
• Europe (west)
• Mediterranean
• Europe
• Eurasia
• Transatlantic
• Eurasia, Africa & Pacific
• The World

Other entries in Bern

Bümpliz- Wieder deheimä

09.02.2007 - 28.02.2007

Isuffet:                        09.02.2007
Uf das hett mä ds Bärn scho lang gwartet: Issufet im Hause Weinmann/Hurni J Wie immer äs richtigs Party Hightlight! Leider hei mir nid aui chönnä iladä, mir hei ja no äs paar Überraschigä vor üs J D Stubä hett sech aber glich rächt gfüllt, ds Bier isch gflossä u dr Lärmpegu isch gstigä...So dass es spätischtens ou jetz aui Nachbarä hei pögget, dass mir wieder zrügg si. Jetz pfifft ar Normannenstrass wieder äs angers Vögeli; us mit dr Rueh. Mir kiffä üs schliesslech nid aui Tagä ids Komä wie üsi Ungermieter...Am Nami isch d Brigä mit dr härzigä Elena uf näs Bsüechli cho und mir hei ä Spaziergang zu dä Schäfli gmacht. D Elena plouderet ou scho prächtig und wirblet wild dür d Gägend; ganz ds Mami J Nadala; mi nöi Namä....Zum Fondue isch de wieder le club des cinque, wie scho ds Weekend vorhär inägschneit. Bevor di grossi Meutä isch itrudlet, si scho mehreri Fläschä Wisswy i dä Gäumä verschwundä. Später hei Mese und Luc ds Bierfässle azapft und dr Abä isch zimlech feuchtfröhlech aklungä. Mä hett ja schliesslech öppis ds firä gha J Mit dä Hurni Bröthers isch bis i di früechä Morgästundä no so richtig abgrockt und headbänget wordä. Sogar äs Lättli vom Bettsofa isch no ds Bruch...Im Partyfläsh innä hei mir zu spätnä Morgästundä no dr Geyer ds Schaffhusä usem Näscht ghout. Sponti wie immer hett är sech für am Samschtig grad säuber igladä!
 
....auso scho wieder Party:                        10.02.2007
Dies mau mit em Obersüffü Geyer und mit Mirj's (wo geschter wägä Müedigkeit nid si cho!)
Ou dr Stöffs isch scho wieder fit gsi für di nächschti Party! Mir si auso nur ds sächst gsi, was mä nie hätt dänkt, we mä am Schluss di läärä Fläschä hett zeut! Dr Geyer hett bi üs no sis Donschtig's Hängover uf sini Art uskuriert J
 
Märcu's 29-igschtä Geburi:                        11.02.2007
Mir chömä gar nümme usem firä usä...Am Märcu si 29-igscht hett bereits mit em nä riesä Brunch im Hause Hurni agfangä. Sämtlechi Thuner, le club des cinque, Dave mit Family hei ds Huus gfüllt. Hei herrlechi Turtenä und äs Raclette verspisä. Mhhhh!!!¨
 
Wohnigrenovation:                        12.02. - 16.02.2007
Obschon mir eigentlech no Ferie hei, isch di ganzi Wuchä Arbeit agseit gsi! Zersch strichä, nöii Bödä verlegä und wieder aues iruhmä. Zwüschädürä hetts aber immer wieder für nä Party glängt. Am Mittwoch hei mir mit em Dave zämä am Stöffs sini nöii Wohnig igweiht. Dr Stöffs hett di Glägäheit am Schopf packt und am Dave si Alkoholfrei Monet usgnützt für nä Iladig. Billiger chunnts nie meh! Bi däm Alass hei mir de no grad di elf Gebot für ds nächschtä GA-Reisli uf Papier bracht. Dr Papa Dave hett sech anerbottä, d Planig für ds nächschte GA-Reisli id Hand ds näh!!! Na, ob äch das guet chunnt???
Am Fritig hei mir ä Charä gfüllt und si uf Ipsach gfahre. Dört hett scho äs fein's Ässä und die nächschti Party uf üs gwartet. Üsi Gschänklis hei sehr Aklang gfundä; vor allem d Reaggaton-CD J äs isch niemmer meh ds brämsä gsi u aui hei ds Tanzbei gschwungä...
 
Bartour dür Bärn:                        17.02.2007
Da mir di nöie Bar's vo Bärn no nid kennä, hei mi ä Bartour vorgschlagä! Denä, Karen, Al, Simä und Geyer hei üs dür d Capitol gfüehrt und üs di agseitä Bar's präsentiert. Im Nachhinein wüssä nümme ganz aui, wo genau mir überau si gsi. Uf jedä Fau isch's ä sehr witzigi Nacht wordä, wo mir gli wieder müessä wiederholä. Sogar dr Güschäfläsher hett no üsi Wägä gchrütztJ Viel hett sech auso nid gänderet ds Bärn!
 
Überraschig Vitu's:                        18.02.2007
Bi prächtigem Wätter hei mir dr Ernesto, oder är üs uf ds Land gfüehrt: Boll! Da wohnä ja bekanntlech d Titlä und dr Viteli. Di Vögelis hei aber leider nid ufta. Hei dänkt, di si äuä uf dä Schi,  drum hett haut fangs dr Briefchaschtä müessä dra gloubä! Nachem nä schönä Land-Spaziergang hei mir scho wieder wöuä abfahre, wo plötzlech us heiterem Himmu dr Viteli isch cho ds secklä. Är hett nach dr Rückkehr vo sim Brütsch ufem Parkplatz dr Ernesto entdeckt und zersch gmeint, mir sigi scho dobä bir chrankä Titlä. Dem war aber nicht so...So hei mir anang doch no troffä, haut leider nur fangs di einti häufti! Komplett gse mir sä de ar Fasnacht J
 
Jungfroujoch:                        21.02.2007
So, üsi Reisebrichtlis neigä sech scho gli am Ändi zue L No di letschtä Zitlä bis änds Februar, bevor für ä Märcu wieder äs angers Vögeli pfifft. Die Wifag ruft...Vorhär hei mir aber ufem Jungfraujoch no dr Schnee gnossä. So höch hei mir dä Winter ufä müessä, um ä aständigi Schneepracht a dsträffä. Mit em erschtä Zug isch ds Trio Alpinistos richtig Oberland düset.  Bereits am morgä am haubi nüni si mir scho im füftä Bähnli für uf ds Joch ungerwägs gsi. Da hei mir's aber preicht mit em Wätter. Strahlend blaue Himmu, Sunneschin und mildi Temperature; eifach herrlech! Nach dr obligatä Fotosession vor em Top of Europe hett dr Stöffs scho ghetzt für no höcher ufä! I dä Bärgä isch är gar nümme ds brämsä!!! Während mir si ds Südamerika gsi, isch är hie zum nä richtigä Alpinischt mutiert! Vor Frisur här chönnt mä zwär eher meinä dr Einstein, aber ou gwüssi Züg vom Reinhold Messner si nid abdsstrittä! Hüüü, hopp....Dr Messner hett üs quer dürä Schnee gjagt, bis mir schliesslech bir Mönchjochshüttä uf 3650 Meter si acho. Zum Glück si mir bereits höhäproofed J Uf derä Höchi hett sech üs äs wunderschöns Panorama uf di umliegendi Bärg-und Gletscherwäut bottä. Vor lutter Bärgä si mir nid mau zum z'Mittagässä cho. Wieder zrügg uf dr Sphinx hei mir üs unger di zahlrichä Japaner gmischt und Aletschgletcher, Mönch und Ispalascht bewunderet. Schön, die Schwitz!!! Uf dr chlinä Scheidegg hei mir de ändlech äs z'Mittag-z'Nacht chönnä zu üs nä, bevor's mit em Schlittä talabwärts isch gangä. Wo dr Schnee plötzlech rar isch wordä, si mir wieder uf ds Zügli umgstigä. Nach äs paar witternä Umstigä und en nä Coup si mir de ou scho wieder ds Bärn acho...
 
Bsüechli bi dä Torregianis Nadia, Torré und Janis:                        22.02.2007
I üsere Abwäsäheit isch nid nur am Dave si Junior uf d Wäut cho, sondern ou little Torregiani, dr Janis ! Dä süess Sprössling hei mir hütt kennäglernt; würklech voll dä Papä J
 
Fasnacht:                        23.02. - 24.02.2007
Di letschti Fasnacht hei mir leider verpasst, aber für d Fasnacht 2007 si mir derfür voll parat gsi. Tuntenä (Evil King und Mese) und Schnouz Kepab (Weinmann's sistas) hei sech bim Zytgloggä zu dä Cowboys (Simä und Fäbu) gsellt. Ds närrischä Tribä dür d Beizä vo Bärn hett chönnä losga. I dä Gassä isch ja das Jahr nid grad vieu los gsi. Ds Bier isch derfür dinnä umsomeh gflossä, d Tanzbei si gschwungä wordä und wo mir hei wöuä hei ga, isch üs dr Tüfu höchschtpersönlech begägnet; und das ersch no im Doppupack! D Titlä und dr Viteli; d Vögelis J Am Samschtig si mir scho eher üs säuber gsi; d Rockergäng hett sech ar Normannestrass versammlet, um di letschtä Vorbereitigä ds träffä. Schwarz Nagulack, Tatoos, Piercings, Chöttinä und Nietägürt...No nä Evil Blick id Kamera und d Gäng hett Bärn unsicher gmacht J D Lütt hei scho fasch Angscht gha vo derä Bruet; derbi si mir doch aues ganz liebi! Ir Stadt hei mir no ä Z
ämästoss gha mit Globis (Andlä und Benj) und dä Tüüflä (Titlä und Vitu). Ds nünt si mir dür d Gassä vo Bärn zogä. Äs isch wie immer sehr amüsant gsi! Da mir ersch am Morgä am sächsi ids Bett si cho, hei mir am Sundig grad ä Erholigstag brucht J
 
Gornergrat:                        27.02.2007
No mau hei d Bärgä glockt; diesmau allerdings nur d Hurni-Bröthers. D Nadlä hett sech mit däm fucking RAV müessä d Zyt vertribä! Und das ersch no ohni Erfolg! Da zaut mä doch jahrelang i di dämlechi Arbeitslosäkassä Gäud i und gset schlussändlech we mä's mau chönnt bruchä doch kei Rappä!!! We mä über näs Jahr im Usland isch gsi, hett mä kei Aspruch uf Arbeitslosägäud und gilt outomatisch us usgstüret! Fuck, devil, hell! Mese und Chürä hingägä hei dr Tag ufem Gornergrat gnossä. Chli i dä Bärgä höcklä, d Ussicht gniessä, fötelä und ä Talabfahrt uf Zermatt mit dä Schi...Und das aues vorem schönschtä Bärg vor Wäut; em Matterhorn! Äs isch schön wieder ir Schwitz ds si J

So, üsi Brichterstattig und Räubergschichtä hei somit äs Ändi gfunde. Ä Churzzämäfassig vo aunä Länder wird in Kürze (oder Länge) foglä...Tschou zämä J

Add to del.icio.us Add to reddit

Photos / videos of "Bümpliz- Wieder deheimä":