Choose another map, showing:

• The Caribbean
• Amazon
• South America
• Transatlantic
• The World

Other entries in Cartagena

Ipiales - Cartagena

 22.11.2006 - 13.12.2006

Ipiales - Popayan HAPPY BIRTHDAY BRIGÄ     22./23.11.2006

Am nächschte Tag hei mir ds Alto Tambo ändlech chönnä abfahre und hei's bis uf Kolumbie gschafft. Am Zoll si grad mau d Compis usgstigä und mir hei scho wieder chönnä wartä! När hett dr Märsu i si Pass äs mickrigs Stämpeli verpasst becho, wo natürlech niemer hett chönnä läsä! Sie hei gfundä, dass sig keis Problem...Scho 5 Minutä später bim Outozoll hei sech si Typä natürlech gfragt, ab däm Gigu-Stämpeli. Zum Glück hett's de när glich no äs bessers gä, wo mä wenigschtens jetz ds Ireise-Datum cha läsä :-) Am Zoll isch zimlech's Lumpäpack umägschwirrt: Düschteri, unsympathischi Typä! Kolumbie schint aber trotzdäm nid viel gfährlecher ds si, aus anderi südamerikanischi Länder. Mä muess eifach vorsichtig si wie überall! Da soll no einä bhouptä, reisä sig Erholig! Erholsam isch's einzig ds Argentinie, uf dr Oschhterinsu, im Dschungu und uf dä Galapagos :-) Genau hütt vor em nä Jahr si mir deheim gstartet. Ds Pasto i rä kolumbianischä Grossstadt hei mir de üses 1-jährigä Reisejubiläum gfiret. Pasto isch aber leider wieder eini vo denä zahlrichä Südamerikanischä Stätt, wie fasch aui, zimlech unspektakulär!!!

Vo eirä Stadt i di Nächschti...D Fahrt nach Popayan hett üs dür nä schöni, extrem grüeni Hügulandschaft gfüehrt, entlang a ängnä Schluchtä und witti, tropischi Täler. D Strassä-Polizei ds Kolumbie chrützt grad im 6-er Grüppli uf, jedä schwär bewaffnet mit Sturmgwehr! Und das aues nur für nä Uswieskontrollä!!! Die kurvärichi Strass hett üs nach Popayan gfüert, wo mir üs uf em nä bewachtä Parkplatz hei ignischtet.

Popayan:                                 24.11.2006

Glücklich sind die Daheimgebliebenen, wo sogar no ds mitts ir Houptstadt di suberi Alpäluft chöi iatmä :-) Ds Südamerika gsets diesbezüglech i dä Stätt absolut schitter us. Keis Wunder, (siehe Foto Laschtwagä!!!) Popayan mit 200'000 Iwohner eher ä Chlistadt, wär eigentlech no schön, we da nid d Abgaswulkenä ds Bild würdä trüebä! Lärm, Gstank, Ghup.....Dr Albtroum schlechthin!

Popayan - San Augustin:         25.11.2006

Ändlech hei mir die Stinkstadt verlah und üs uf d Natur vo Kolumbie gfröit. Dr Wäg nach San Augustin hett's in sech gha. Dürä Nationalpark Purace, dür nä luschtigi Militärkontrollä, über nä zerfätzti Brügg, verbi am nä abgstürtze Bus und schlussändlech no dür di gfährlechi, kolumbianischi Nacht :-) Einisch meh hei mir vieu Zyt mit Wartä verbracht. Äs paar mikrigi Krändli hei dä am morgä am füfi abgstürzt Bus wöuä ufäzieh. Toti hetts schins keini gä, aber Verletzti sicher scho. Es hett ömö no rächt krass usgseh! Cha mä numä froh si, nid mit em Bus ds reise!!! Da nimmt mä di holprigi Strass gärn i Chouf; mit üsem Outo keis Problem. Mä fahrt ja schliesslech kei Landy :-) Ds San Augustin hei mir nach so langer Zyt ändlech wieder mau ä Camp gfunde. Gmüetlech: mit Ross, Chüeh, 9 Hünd, Hüerner, Gügglä und ärä härzigä schwarzä Chatz namens Luc(i). Näbädrann im Schwümmbad stigt ä Salsaparty, ändlech mau chli Latino-Charm ohni dä blöd Reggaeton :-)

San Augustin: HIPP HIPP HURRA LA CARENA!!! HAPPY B-DAY :-)        26.-28.11.2006

Dr Tag hett agfange mit em nä Güggü-Gchrächtz und 5 jungnä Hündlis! Die 5 junge Spätzlis si dr absolut Hammer!!! Tolpatschigi, chlini, dicki Pantschlis...San Augustin isch äs Dorf ds mitts ir Natur, berüehmt für sini bis zu 5'000 Jahr autä Steiskulpturä. Gmeissleti Gsichter, Götter und Tier umgäh vo grüenem Rasä prägä ds Bild vo däm archeologischä Park, wo unger Wältkulturerbe steit. Sitt genau elf Jahr luegt d Unesco derzue. Zu Alass vo däm Jubiläum isch grad hütt dr Itritt gratis gsi :-) Dr Märsu isch sogar no vom nä Fernseh-Team intervieut wordä. Das allerdings hett weniger professionell gwürkt. Ds Mik hett nur so gruschet, und änglisch hei di Type ou nid rächt chönnä, obschon sie ds Interwieu uf änglisch hei wöuä mache :-) Isch sehr witzig gsi! Trotz em zersch 30 Grad heissä Wätter hetts üs plötzlech eländ verschiffet. 1 Stund lang hetts voll abägschüttet, dr Park hett när umso schöner usgseh.

Hütt hei mir üs wieder mau äs Ritt-Usflügli gönnt. 4 Stund rittä für 2 Personä incl. Privatguide choschtet hie grad mau 22 sFr! Das isch üse sächst Usritt ds Südamerika gsi und so gueti Ross hei mir no nie vorhär gha. Ungloublech lieb, folgsam, sympa, schön und natürlech uf Vollspeed :-) Die si ab wie nä Raketä, im Gägäsatz zu üsnä letschtä lahmä Gäul uf dä Galapagos...Zuckerrohr schint di perfekti Nahrig ds si für Ross!!! D Mariposa und d Princessa hei träberlet und galoppiert, ohni das mir sä nur eis einzigs mau hei müessä atriebä! Mir si dür nä fruchtbari, hüglegi Gägend verbi a Kaffeplantage, Zuckerrohrabou, Bananeböim, Bluemä, Schluchtä, em Rio Magdalena und zahlrichä Wasserfäu grittä...Natürlech hei ou d Steiskulpturä nid gfäut. D Stimmig mit em schwarzä Himmu isch einmalig gsi. Di 12 Kilometer Usritt si für üs mittlerwile rächt unsportlächä de glich ä rächti Asträngig gsi. Am Schluss si mir no dür ds Dorf galoppiert, hei im nä Ladä 800 gramm Fleisch, Bier und Gmües gchouft. Aui Zuetate für nä glungnegi Grilladä :-) Dür ds Dorf wittergrittä zum Camp hei mir de das Prachts-BBQ verschlunge. Mhhhhhh, eifach herrlech so riesigi Fleischbitzä! Dervo cha mä ir Schwitz nur tröime :-))) Üsi suberi Gluet und ds knusprigä Fleisch hett de ou no grad ä kolumbianischi Family incl. 4 Chind zum brätle animiert! Im glichä Zug hei mir leider no müessä feschtstellä, das üsä Guschti Weder vo denä zahlrichä Hünd ufem Camp isch agknabberet wordä :-( Es fäut ihm jetz ä Bitz und är isch numä no semi-attraktiv!!! Ds Quito mitti Novämber isch är no i voller Pracht erstrahlet...Und das nachdäm är so viel hett dürägmacht, tröi a Ernestos Front!!!

Hütt hei mir ä abhänger-hänglooser Tag i däm gmüetlechä San Augustin igschautet :-) Chli Outoputz, ufrume, mau wieder so richtig abgwäsche, dr Wassertank gfüllt, igchouft und si ids Internet...Ou die jungä Hünd hei mir natürlech wieder gnossä. Herrlech hie ufem Land! Im Internet hei mir no erfahre, dass d Karä nöii Sektretärin vom Silvio wird. Isch das nid witzig?! Klassentreffen im Büro :-))) Ou vo üsem senilä Seemannskolleg, wo grad jetz wieder uf dr Grimaldi isch hei mir Poscht becho. Allerdings weniger erfreulechi. Dr Chef-ing. Roberto, wo id Gschicht igeit mit dr absolut gröschte Klappä hett uf dr Grimaldi ä Härzinfarkt gha und isch grad gstorbä! Mir hei scho letscht Jahr dänkt, dä läbt nümme lang bi däm Läbenswandu! Witteri News hei mir vom Klaus becho. Dä fahrt wie nä picktä dür Südamerika und isch jetz bereits ds Santiago! Bevor mir uf d Galapagos si, hei mir nä per Zuefall uf dr Strass troffä. Denn isch är grad ersch vo Peru nach Ecuador igreist. Während mir 3 Wuchä uf dä Galapagos hei ds Läbä gnossä, isch är ohni öppis adsluegä dür ganz Ecuador und Kolumbie brätteret und wieder abä bis nach Nasca (Peru). Würklech Vollspeed...Keis Wunder isch sini Frou d Dorothea Psycho! Dr Franz, üsä Peninsula Valdes Kolleg hett üs no super Fotis gmeilet vo dä Wale. Oktober/Novämber schint die beschti Zyt ds si dört...Es wimmlet numä so vo Walä und das diräkt ir Bucht! Da müessä mir de ou wieder mau härä...

San Augustin - Bogota: YEAHHHH, HAPPY BIRTHDAY KARÄ!!!           29.-30.11.2006

Nach 4 Nächt hei mir San Augustin leider verlah. Mir hei die Gägend aber super usgchoschtet. No äs letschts mau d Hündlis pantschlet, bevor's isch abgange über Bärgä, saftig grüeni Wiesä, Schluchtä entlang am Ufer vom Rio Magdalena und verbi am nä schönä Rägäbogä. Ä Ougäschmaus das Kolumbie! Gfährlech sigs momentan grad nid so extrem, sägä sie...Es stoglä ja schliesslech gnueg Bullä und Militär ir Gägend umä. Mir hei feschtgstellt, dass enorm viel grüengchleideti am Viteli glichä! Hi, hi, hi...., ds Viteli-Titlä-Grüen isch hie omnipräsent :-) Momentani Temperatur im Outo am Abä am elfi : 34 Grad!!! Schwitz, schwitz...mir schmachtä dahin!

Karä, di Geburi hei mir mit em nä Metallica-live-in-Ernesto-Konzärt und em nä chüehlä Blondä gfiret :-) Morn geits witter uf Bogota, dört solls ja de wieder chli chüehler si...

Ä längi Fahrt ids Chaos vo Bogota! Zersch dür ds hitzigä Töifland, über bruni Flüss, smaragd-grüeni Hüglä, kurvigi Bärgstrassä und schlussändlech id Gross-Stadt. Bogota liegt uf 2'600 Meter. Ungerwägs hei mir üs bi eim vo denä zahlrichä Fruchtständ ar Strass mit Vitamine ideckt. Herrlechi Kokosnüss (pro St. 50 Rp.), 10 Banane (50 Rp.), Mangos (ou 50 Rp pro Stück) und anderi undefinierbari Frücht. Obscht und Gmües isch ungloublech billig, während Outofahre uf dä kolumbianischä Strassä ungloublech vieu choschtet! Uf 280 Kilometer hei mir über 20 Stutz Strassä-Gebühr la liegä! Da chunnt de ds fahrä ir Schwitz scho wäsentlech billiger!

Bogota:                                       01.12.2006

D Stadt vor Shakira :-) Ä Chrächtze a la Shakira isch üs zum Glück nid begägnet, derfür hei mir süsch rächt vieu pinlechi Wyber entdeckt hie. Z.B. ä über 50 jährigi übergwichtigi i Mini und Netz-Strümpf :-) Die schönen Frauen lassen grüssen...Ä Juanes isch üs leider ou dür d Büsch! Hie si Manne mit Schnöiz inn :-) Die jungä hei grad mau die griechischi Fäckä-Biber-Frisur entdeckt, (eh, Gianni...!) So viel zu dä Bogotaner... Süsch isch's aber no rächt fründlech hie, es hett äs zimlechs schöns Altstadt-Viertu, viel Musee, schöni Chiuchlis und goldigi Plätzlis...Am Morgä hei mir am berüehmtä Gold-Museum äs Bsüechli abgstattet, uuhhhh das hett glänzt :-) Gold soweit das Auge reicht! Ds Museo de Oro isch eis vo dä wichtigschte Musee wäutwit und zuglich no ds berüehmtischte Goldmuseum. Ds Bsüechli hett sech uf jedä Fall glohnt! Nach äm nä tüürä z' Mittag im Mac (Europäischi Prisä!) si mir dür Bogota gschländeret und hei üs weiss dr Tüfä was aues agluegt: Catedral San Francisco (Gold Altar), Plaza Boliviar (in Advänts-Stimmig), Candalaria (es hübsches Gässli), div. Chiuchenä, Polit-Paläscht (aues strengschtens bewacht) etc...Ds Altstadt-Viertu vo Bogota isch würklech ganz hübsch, aber dr Räscht doch eher unübersichtlech und liechters chaotisch!

Zipaquira:                                       02.12.2006

Ir nöchi vo Bogota liegt Zipaquira. Es schmucks Städtli bekannt wäg dr einmaligä, unterierdischä Salzkathedralä. La catedral de sal isch ä Teil vo rä riesigä Salzminä, wo no hütt 800 Tonnä Salz pro Tag abboue wird. Ds Salzvorkommä vo derä Gägend würd längä, um 100 Jahr die ganzi Wäut mit Salz ds versorge! Dr Houptruhm vo derä Chiuchä isch 25 Meter höch. Aui Chiuchä-Sääl bietä Platz für 10'000 Personä. Mit em nä Guide si mir 1'500 Meter dür die unterierdischä Gäng vo derä Salz-Chiuchä glüffä. Äs richtigs Labirinth; mä hätt sech scho fasch chönnä verloufä! Eini vo dä interessantischtä und schönschtä Chiuchenä wo mir bis jetz hei gse. Schlicht, alles us Salz, schön belüchtet und ohni grossä Schnick Schnack. Nur äs paar Ängelis und Chrütz us Stei zierä d Wänd. D Chrütz würde sech beschtens eignä für näs Metallica-Cover :-) Nach em Rundgang mit em Guide, hei mir no Zyt gha für ds Fötetlä. Das hett üs grad über 2 Stund i Aspruch gno :-) Gägä Nami si mir witter gfahre id richtig Kaffe-Abougebiet vo Kolumbie. Niederglah hei mir üs i rä Hosteria vo rä gäudgierigä Schrullä. Für das mir ufem Parkplatz übernachtä, hätt sie glatti 18 Stutz vo üs wöuä. Zaut hei mir de när 6.50, was ou no rächt fräch isch. Äs isch ä feudali Villa mit Hotelzimmer (13.50 pro Person), ä privatä Agstelltä wo aues erledigt, ä Pool wo mä wäg Verunreinigung nid cha bruchä, ä ischauti Duschi, ä lärmigi Strass und natürlech wieder mau ä Güggü, wo üs am morgä am füfi weckt! Da's ja kei Brätlistell hett, hei mir üs für näs Schoggi-Fondue entschiedä. 500 Gramm Schwitzer Toblerone mit richhautiger Milch und frischnä Banana und Mangos. Karin und Karen sei Dank :-) Das isch wieder mau ä ächtä Goumäschmaus gsi! Nur schad, si mir jetz mit Toblerone usgschossä...Ds Kolumbie cha mä so öppis feins leider nid chouffä! Ou am Zeus (Hund) hett dä Schoggi ä enormi Fröid bereitet.

Manizales - Parque Ucumari:                 03./04.12.2006

Am nächschte Tag isch's wittergange dür näs heisses Tal, überä Rio Magdalena, uf nä höchä Pass (3'500 Meter), verbi am schneebedecktä Monte Ruiz bis nach Manizales. Ä Stadt, wo nicht der Rede wert isch! Sitt mir ds Kolumbie si, hei mir fangs ei einzigä anderä Touri gsichtet. Ecuador isch völlig Touri-überlüffä, Kolumbie grad ds purä Gägäteil! Mir hei wieder mau uf em nä bewachtä 24-stundä Parkplatz übernachtet. Bis mir de so öppis hei gfunde am Sundig i derä Stadt!!! Dr Gipfu isch no gsi, wo's hett gheissä, im Outo übernachte sig nid erloubt. Mir souä zum nächschte Parkplatz nur grad umä Eggä. Natürlech hett's kei anderä gha! So eifach wird mä üs aber nid los :-) Mese hett dr Tarif dürägä und mir si blibe für d Nacht! Am nächschte Morgä de no grad mau dr Hammer: anstell vom abgmachtä Pris, hätt mir plötzlech ds doppletä söuä zahlä. Mir heigä ja schliesslech verbottenerwies im Outo pennet! Nee, so nicht mit uns! Nach ärä heftigä Diskussion hei mir dr normal Pris zaut, dr Küder deponiert und Manizales fluchtartig verlah...

Ä simpli Foto-DVD hei ds schickä würd übrigens ds Kolumbie glatti 13 Stutz choschtä unigschgriebä. Igschribe choschtet das Spässli ungloublechi 72 sFR!!! Keis Wunder wüssä d Lütt vo Manizales nid mau, wo sech d Poscht befindet. Gäud abhäbä, hett dört ou ersch bim sibete Outomat klappet, u das ersch nur für 100 sFR! Das brucht Närvä!!!

Für i die schöni Natur ds cho, hei mir dür nä blödi Stadt müessä fahre, Pereira. Ändlech si mir im Parque Ucumari acho. Hie hett üs no grad mau einä gnärvt! Campierä sig im ganzä Park verbottä! Uf ds tüürä Hotel, wo är üs hett wöuä adräie, si mir natürlech nid igstigä! Mir si ja nid blöd :-) 5 Km witter, am ändi vor Strass, hei mir de easy chönnä campiere...

Parque Ucumari:                  05.12.2006

Yeah, Luc und Nath eis Järhrli äuter!!! Next Jahr chömmä mir de ou wieder ad Party :-)

Grad wo mir ä Wanderig hei wöuä startä, isch's plötzlech cho schiffä was es hett abä mögä! Nach eim Kilometer wanderä, hei mir wieder müessä chehrä. Trotz Pellerinä, klitschnasssssss!!!! Dr Räscht vom Tag hei mir im Outo verbracht, mau ohni ds fahre! Derfür hei mir volli Arbeit am Compi gleischtet...Evääääls, wie isch eigentlech ds Iron Maiden Konzärt gsi? Das isch üs leider einisch meh dür ds Büsch!

Fahrt nach Medellin:                      Chlousätag!

Nach em nä höchscht müehsamä Fahrtag mit viel ds viel Verchehr, si mir am Abä ds Medellin igfahre. Hie hättä mir eigentlech wöuä übernachtä. Das hett sech dört aber us unmöglech usägstellt. Uf keim einzigä Parking hei sie üs wöuä im Outo übernachtä! Dr Märsu isch äxtra no ds Fuess bi verschiendenä Parkings ga fragä. Da d Lütt eifach nid chöi zuelosä, gitts haut immer wieder Missverständniss! Uf d Frag, ob mir i üsem Outo chöi übernachtä, isch d Antwort gsi: Ja, ja es hett Hünd!!! Wo dä Volldepp ändlech gschnallet hett, was mir wei, hei mir ds Fäud wieder chönnä rumä! Nid ei einzigä wär chli hilfsbereit oder fründlech gsi! Nach 4 Stund Parkplatz suchä und ds Medellin umäirrä, isch's¨üs ds bunt wordä. Mir hei d Stadt wöuä verlah, aber leider kei Uswäg gfunde...Wie überall ds Südamerika isch ou hie nüt ds wöuä mit Wägwieser! 100 verschiedeni Strasse, frage frage und nomau frage bis mirs de ändlech hei gschafft! Us dr Stadt dussä, isch's grad im glichä Stil wittergange!!! Riesigi, bewachti Hotelparkplätz, Tankstellä etc....Platz am Meter hätts gha, aber ds Kolumbie isch campiere im Outo äs Frömdwort! Bi rä Horror lärmigä und abgasigä Tankstell hei mir de spät am Abä und scho fasch verhungeret doch no dörfe übernachtä! Kolumbie isch nüt für Outotouris mit schwachnä Närvä! Es brucht Närvä us Stahl!!!

Medellin - Planeta Rica:                              07.12.2006

Nachdäm mir wieder mau ä ganzä Tag gfahre si, isch am Abä d Parkplatzsuechi incl. Duschi vo neuem losgange! Scho d Fahrt allei isch kei Spass gsi, bi däm Verchehr! Hie hetts no meh Laschtwägä aus ds Brasilie! Mä fahrt hunderti vo Kilometer über Pass-Strassä ähnlech wie ir Schwitz, Kurve um Kurve, Hügu uf Hügu ab und immer wieder die blödä Laschtwägä, wo eim mit 20 Km/h dr Wäg versperrä! So hei mir für 100 Kilometer prompti 3 Stund brucht! Derze chömä no di höchä Strassä-Gebühr...Bi derä müesahmä Fahrt, hei mir üs mit em nä guetä z'Mittag im Restaurant wöuä ufheittere. Derbi hei mir feschtgstellt, das mir Touris nur grad d Häufti vo dä Iheimischä ufem Täuer hei. Das darf ja wohl nid wahr si, eländi Bschisshünd!!! Bevor's fischter isch wordä, hei mir üs im nä Kaff wöuä niederla. Da mir wieder nüt hei gfunde, hei mir d Bullä gfragt, wo ds Schlafä im Outo möglech wär. A agäblechä Parkplatzbsitzer hett sech ids Gspräch igmischt und sech anerbottä, üs zu sim Parkplatz ds füehrä. Hett sech aber us normals Hotel usägstellt, wo nid mau ihm hett ghört! Natürlech isch dört ds Gstürm vo neuem losgange. Dr aut Sack hett dr Märsu mit em nä billigä Gäudwächsu-Trickli wöuä linkä, und so ä Vermittligsgebühr i ds sackä. Vom Hotel hett är aber ou scho ikassiert! Derzue isch no cho, dass mir schlussändlech dr voll Hotelzimmerpris (8 sFr.) hei müessä zahle, obschon mir nur Duschi und Parkplatz hei brucht. D Gäudgier kennt hie ds Kolumbie keini Gränzä!!!

Convenas - Karibik-Küschte:                      08. - 11.12.2006

Yeahhhhh, ändlech si mir am Meer acho. Die Karibik lässt grüssen...Dr erscht Strand hett aber eher a Murtäsee erinneret, aus a nä Bilderbuech-Karibikstrand! Ou kulinarisch si mir einisch meh konschterniert hie :-( Ds Mittag hei mir 2 Portionä Pommes bsteut, und derbi äs Bebe-Täuer becho! Ir Schwitz gitts für ä glich Pries 5 mau meh!!! Keis Wunder, hei mir ds Südamerika so abgnoh...Äs paar Kilometer wittergfahre, nach Convenas, hei mir ändlech äs Plätzli gfunde zum cämpä diräkt am Strand. Hie gsets scho chli fründlecher us, isch aber immer no nid dr Hammer-Strand für länger abdshänge. Erwünscht isch mä aber ou hie nid so richtig! Ufem Camp acho, hetts zersch ä Überlegigsminutä brucht, bis mir hei chönnä ifahrä! Und das, obschons keini angerä Lütt hett! Die Kolumbianer si so öppis vo unspontan und stur, mä würds nid gloubä!!! Nach au däm wo mir hei ghört vo angernä, hei mir dänkt d Kolumbianer sigä äs guet bildets Völkli. Ds purä Gägäteil steuä mir hie täglech fescht! Keis Wunder brige sis hie zu nüt...

Hütt hei mir dr ganz Tag am Strand verbracht und wieder mau Zyt gfunde äs Buech id Hand ds näh:-) Bim Badä hei mir leider feschtgstellt, dass ds Wasser irgendwie pickst uf dr Hut. Zersch hei mir dänkt, Quallä-Alarm!!! Muess aber vom Dräckflüssli si, wo ids Meer mündet! Wähhhhhhhh!!!!!! Nid mau d Chinder vor Camp-Family wage sech id Kloakä! Mir jetz ou nümme :-( Wieder mau isch le friseur verbi cho und äs paar Haar si mit em Wind dervogflatteret. Da dr Mond grad im Löi steit, isch die Phasä grad perfekt :-) Bi däm heissä Wätter (35 Grad am Schattä) hett üs ä chüehlä Drink gluschtet. Im ganzä Dorf hei mir verzwieflet ä Coco Loco gsuchet. Wo's dä geschter no a jedem Eggä hätt gä, hett's hütt überau gheissä: manana! Wahrschinlech isch nä dr Sprit us...Uf nä Pizza hättä mir ou wieder mau Gluscht gha. Drum isch üs die Pizzeria im Dorf grad rächt cho. Leider wieder ä Fälschlag! A Pizzeria ohni Pizzas!!! Isch so öppis zum gloube? So fies, immer we mir öppis wei, chömmä mir's hie nid über. Das si mir üs gar nid gwöhnt!

Mir hei no ä witterä Erholigs-Tag ds Convenas igschaltet; diesmau meh oder weniger ufem Camp (we mir scho mau einä hei!) Die 3 Camp-Chinder hei fröid gha a üs. Di ganzi Zyt hei mir sä müessä fötele :-) D Camp-Family geit jedä Abä am achti ids Bett, um am morgä am füfi uf ds stah! Warum hei mir bis jetz no nid usägfunde. Für när dr ganz Tag nur fuh umädshockä und nüt ds bügle??? Immer we hie ä Ma zu rä Frou stosst räblets null koma plötzlech, und zwar ghörig!!! Hütt hett im Dorf ä Madam am nä Typ ä Stei a Gring gschossä. Dä liegt jetz flach im Spital! Grund: är hett irä öppis nid zaut. Das si de würklech giftigi Schiss-Wyber hie!!! Ou d Männer schine nid viel meh wärt ds si. Sie hockä dr ganz Tag nur fuh umä und losä Salsa. Überall wird mä förmlech bombardiert vo däm Sound...Das wär äs wahrs Paradies por la mama y la prima Melanie! Da chönntet dir de ds Tanzbei schwinge :-)))

Am Strand, wie ou überall ghört mä zudäm ständig die magischä Wort "a la orden"...Das isch äs Phänomen, wo ersch ds Kolumbie isch erschine :-))) Es heisst so viel wie : cha ig behilflech si? Was hättet dir gärn? Zur ihrer Verfüegig?....Säubschtverständlech ghört mä die Wort ou we mä eifach nur sini Rueh wott!

Isla de San Bernardo:

Hei üs wieder mau äs schöns Usflügli gönnt. Dies mau Karibik pur!!! Mir hei 5 Inslä vor Insugruppä San Bernardo bsuecht. Uf Palma und uf Mucura si mir gstrandet. Uf dr erschtä hett's äs bekannts Aquarium ds gse gä, und uf Mucura hei mir spiessä und bädlet. Eifach herrlech i däm türkis-klarä-blaue-laue Meer! Ä chlini, härzigi Insu, speziell für Tages-Touris. Einzelni Iheimischi wohnä uf dr Nachbarsinsu Islote, schaffä aber uf dr Touri-Insu z.b. us Chöch oder Verchäufer. Es hett u härzigi Chind gha, wo immer wieder hei wöuä gfötelet wärdä. D Männer hingägä si extrem gruusig dört!!! Froue, gniesset di schöne Bärner-Gielä :-) Serigi Schönheitä gitts süsch nienä uf dr Wäut! Sogar Aids schint hie uf dr Insu äs Thema ds si. Mir hei grad beobachtet, wie einä vom Feschtland em nä Insulaner äs Aids-Medi hett verchouft! Da gitts doch tatsächlech no Tourischtinne wo da härä chömä cho umä......!!! Uf üsem Schiffli hei mir üs zum nä gselligä Altersusflügli gsellt. Scho am Morgä isch Whiskey i Ströhmä gflossä :-) Mä hett üs natürlech ou ds eintä oder angerä Gläsli igschänkt! Vor auem ä Opa namens Bonifozio hett Barkeeper gspielt. A Land, wie ou im Wasser :-))) Plötzlech isch usem Nichts no ä huerä schönä Toucan härägflatteret. Dr Schönscht, wo mir bis jetz hei gse! Und das hie uf em nä chlinä Inseli, wo mä's am wenigschtä hätt erwartet. Zum krönendä Abschluss vom Tag, hei mir zrügg im Dorf Convenas üs doch no ä Coco Loco gönnt. Ir Bar hei mir's aber nid lang usghalte, da's üs ä frischi Schiss-Brisä hett id Nasä gwäit! Das Ferienparadies?!

Convenas - Cartagena - Arjona:                  12.12.2006

Hei nach 3 1/2 Täg ds Convenas üsi strapaziertä Närvä einigermassä regeneriert und si bereit gsi für nöie Ärger uf ds näh....Dä hett's de ou promt gä, und das bereits vor dr Gross-Stadt! Im Kaff Arjona hei mir uf ärä Tankstell wöuä Gäud usälah. Scho nach em erschtä Versuech hett aber dä blöd Outomat weder Gäud no Chärtli gspuckt. Ä Techniker sött's morn am Morgä am achti cho usähole....?! Glich si mir no uf Cartagena gfahre und hei üs dört scho mau chli umägluegt. Wenigschtens wüssä mir hütt Nacht ömä wo pennä, nämlech ar Tankstell, wo mir uf ds Bankchärtli warte....

Arjona - Cartagena:                                      13.12.2006

Aha, Null Grad ir Schwitz :-) Dervo chöi mir hie numä tröimä! Kolumbie isch ds heissischte Land, wo mir bis jetz si gsi. Ä konschtanti Hitz vo 35 Grad am Schattä :-)

Dä mit em Bankchärtli hett wie scho dänkt natürlech nid klappet!!! Obschon mir bir lärmigä Tankstell hei pennet, hett dr Techniker ds Chärtli irgendwenn ir Nacht uf nä Bank ds Cartagena bracht. Das wär eigentlech vo Afang a üsä Vorschlag gsi; dä isch üs aber usgschlagä worde! 60 Km für nüt gfahre! Wenigschtens hei mir de när ds Cartagena acho uf Ahieb ä billigä Parkplatz gfundä, wo mir easy dörfä übernachtä! Dä isch ersch no super gläbä: Am Rande der Altstadt. Die hei mir üs natürlech ou grad us erschts agluegt. Ändlech wieder mau ä sehenswärti Stadt! Hie cha mä wieder gmüetlech dür d Strassä flaniere und dussä äs Bierli zwitscherä. Äs gitt sogar ä Outo-freii Zonä und sicher sigs ou! Es wimmlet ou hie vo Strassäverchäufer. A la orden??? Jedä möcht irgend ä Brunz loswärdä. Einä hätt üs unbedingt Shakira-CD's wöuä adräie. Uf üsi Antwort, mir losi Heavy Metal hett är gmeint, ahhhhaaaaaa Bum Bum Bum....Reggaeton :-))) Isch ganz ä luschtigä gsi! Ä angerä hätti Schwitzer Frankä und Dollar's wöuä wächsle und isch üs di ganzi Zyt nachäghöselet! D Autstadt kennä mir nach eim Tag scho rächt guet. Morn geits ab uf d Inslä...

Add to del.icio.us Add to reddit

Photos / videos of "Ipiales - Cartagena":