Choose another map, showing:

• The World

Other entries in Puerto Ayora

Galapagos

08.10.2006 - 26.10.2006

Dr 90-minütig Flug nach Baltra (Galapagos) isch wie im Flug vergange! Uf dr Insu glandet, hei üs Bus, Boot und Taxi nach Puerto Ayora uf  eini vo dä 3 bewohnte Houptinslä Santa Cruz bracht. Nach churzer Suechi hei mir äs gmüetlechs Hotel mit Blick uf Seelöie und Echsenä diräkt am Meer gfunde (Meerrusche incl). Ou ds Klima isch u agnähm! Im Pub näbem Hotel Estrella de mar si mir de zum Usklang  vo üsem erschte Galapagos Tag no chli ids Bier gstoche.    
Santa Cruz:                                 09.10.2006
Uf üsem erschte Usflug uf dä Galapagos hei mir bereits einä vo dä schönschte Stränd hie uf dr Insu gse! Wissä Sand, türkis Meer, Iguanas, Chräbslis, Pelikane, Blaufuesstölpler und anderi Seevögelis jeder Art. Ufem Wäg zum Badestrand si üs ou no Kaktuswälder, Mangrove, Lavagstei und wildi Wäuä begägnet. So schön hätte mir's üs nid im Troum vorgsteut, ungloublech! Würklech paradiesisch.

Isla Santa Cruz und Baltra:                        10.10.2006
D Mission Free Enterprise isch gstartet. Bir Besammlig am Flughafe hei mir scho vo wittem zwöi bekannti Gsichter gse; Flürus Kolleg und sini Fründin. Sie si üsi Vorgänger gsi uf üsem Cruise-Schiff! Gägä Mittag si mir a Board vor Yacht und hei üsi Kabinene i Beschlag gno. Mit üs a Board no 15 angeri jungi Lütt und ä spanische Päpu äuterem Semeschters. D Eväääls gseh bereits chli havariert us; sie hei sech scho am erschtä Tag ä Sunnebrand igfange! Mister Evil King-Red-Neck :-) Di 50 jährigi (Ex)-Säguyacht hett üs a nä einsamä Strand vo Santa Cruz bracht, wo mir bereits sehr viel Tier hei gse: Flamingos, Echsenä, riesä Chräbsä, Blaufuesstölpler, black heron und ä Möwä-Art, wo's nur uf dä Galapagos gitt quasi ä endemischi Spezies! A däm atemberoubendä Strand, hei Mese und Al fasch nümme nachämögä mit fötele und filme! Bi üsem erschte Schnorchugang im türkis Wasser hei mir scho mau ä Iblick id Unterwasser-Wäut becho. Später hei mir im gmüetleche, holz-verspieglete Salon dinniert. Aber nid nur mir hei hunger gha. Rund um üses Boot si zwöi bissigi Haie am jage gsi. Wo mir hei härägluegt si mir vo Tier umgä gsi. Ou dinne isch's voll abgange. Dr süess Wilkommens-Drink hett d Salsa Fans zum tanze annimiert. (siehe Foto Karen). Wie überau, hetts ou hie sehr viel luschtigi Lütt us aller Wäut! Mir si aber di einzigä Dütsch-Sprachigä. Mit dr 8 -chöpfigä Crew si mir a Board grad glich vieu wie uf dr Grande Argentina. Uf däm chlinä 2-Mäschter schouklets leider chli meh, aus mir's üs vor Überfahrt gwöhnt si! Bis jetz isch aber no niemer seechrank worde; Holz alängä!!!
Isla Southern Plaza - Isla Santa Fe:                                 11.10.2006
Ds Southern Plaza acho (dry landing), si mir fasch über d Seelöie gstoglet, wo sech ufem Stäg hei umätummlet. Sofort si mir ou vo Iguanas und verschiedenä Seevögu umschwärmt wordä. Uf Santa Fe, dr nächschte Insu, hei mir üs wieder i di super-sexy Schnorchu-Dresslis presst. Mir si froh, hei mir die gmietet! Ds Wasser isch nämlech rächt chüehl, sicher unger 20 Grad. Gseh hei mir während em Schnorchlä no nid grad vieu. Abgseh vo näs paar exotischä, farbigä Fischä. Nach dr anschliessendä wet landing (d.h. bim usstigä usem chlinä Böötli wärdä d Bei und ev. ou no meh nass), hei mir d Insu Santa Fe ds Fuess erkundet. Hie hei vorauem d Seelöie und di wunderschöni, mystischi Abästimmig fasziniert. Ou ä Galapagos Falka ziert no äs Foti. Viel so einmaligi Tier gitts nur uf dä Galapagos und süsch nienä uf dr Wäut! Nachem z'Nacht ischs de so richtig abgange mit Wäue. Mir si sächs Stund gägä Strom ufem offenä Meer gfahre. Zum Glück hett üs dr Wy rächt igschläferet, so dass mir herrlech hei chönnä pennä!
Isla Espagnola:          12.10.2006 (HAPPY BIRTHDAY MAMI!!!)
Nöie Tag, nöii Insu: Das mau hett üs Espagnola mit em nä herrlech wissä Sand-Strand voller Seelöie und türkis blauem Wasser verzouberet! 3 Stund hei mir Zyt gha, d Gardner Bay ds erforschä (und das isch no fasch ds weni gsi!).
Zu Land und en esnorkling. Ä fettä Wasserschildchrot isch vo dä Eväääls gflüchtet. Äs paar Meter hett är di zwöi uf ihrem Schnorchugang begleitet. Ä verspieltä Seelöi isch unger Wasser um d Nadlä kreiset, und hett mit ihrä äs nöis Spiel-Kamarädli gfunde. Ä grossä, fettä Seelöi isch diräkt uf ä Märsu zuepfilet und im letschte Momänt abtoucht. Wow, so nöch si mir no nie a sertigä Tier gsi! Zrügg uf dr Free Enterprise isch ds grossä Bagger wieder voll losgange: Bis uf eini, wo usgseht wie nä Lesbä, wärdä hie aui Froue vor Crew abaggeret! Da schreckt nid mau ä Fründ vo Meses und Evil King's Kaliber ab! Us letschts vom Tag isch no Punta Suarez mit em Blow-hole ufem Programm gstande. Ds eigentlechä Hightlight vo derä Insu si aber di zahlriche Vögu, wo's nur uf dä Galapagos gitt: Waved Albatros, Bluefooted-Boobies, Mocking-Birds...
Isla Floreana:                      Fritig, dr 13.!
Per wet landing si mir uf dr Insu Floreana gstrandet. Dört hei mir im "post office" nach schwitzer Poschtchartene zum mittnäh gsuecht, und si id Ungergründ abgstiegä. Mit Taschelampä und Wanderschueh bewaffnet si mir i nä Höhli us Lava (Lava-tube) gstige. Ä ungerirdischä See hett üs nach 150 Meter dr Wäg versperrt, da hätt nur no schwimmä im 10 Grad chautä Wasser ghulfe :-) Im nä wittere Teil vo Floreana si mir no d Flamingos und d Stachurochä ga bewunderä. Am Strand hett üs ä wunderschöni Muschlä aglachet, wo mir verbottenerwis de grad hei ipackt. Ds grossä Morgäprogramm hett üsi Mägä so richtig machä ds knurrä. A ds Ässä isch aber leider no nid ds dänkä gsi; no vorem Mittag si mir bim nä Felsä namens Devils crown 1 Stund lang ga schnorchlä! Mit läärem Magä isch's ar Karen, Nadia und Al grad angers wordä! Mit dä Zwischähäpplis hei sie's leider nid so ufem Schiff!!! Vom Morgä am siebni bis am Nami am haubi zwöi nüt ässä und derzue no äs riesä Programm isch eifach nüt für üsi schwache Mägä :-( Ds dritt si mir läär ga chotzä. Hättä mir öppis chlises im Magä gha, wär's absolut keis Problem gsi! Mir hei üs bereits a stark Seegang gwöhnt und si scho richtigi Seemannä :-) Am späterä Nami hett üses Schiff ds Puerto Ayora (Santa Cruz) agleit. Mit em Ziel Alk idschouffä hei aui sofort dr Supermarkt gstürmt! Für di meischtä vo denä Spass-Vögelis isch de das bereits di letschti Nacht uf dr Free Enterprise gsi. Nid aber für üs :-) Dr Abä ds Puerto Ayora ds verbringe hett aber niemer so rächt glockt. 2 Täg vor dä grossartigä Polit-Wahlä herrscht in ganz Ecuador uf dä Strassä und i dä Bars äs absoluts Alkohol-Verbot. Nid aber ufem Schiff :-) Chischtewiis Bier, Woodka und Whisky si a Board gschleppt wordä für di grossi Toga-Party! Ä witzigä Typ us San Francisco (ä Alissia in männlecher, verwilderedet Form) hett das ganzä agrissä. Immer meh vo denä Party-tigers si mit em Liehntuech ighüllt im Salon erschienä. Da hei ou mir nid chönnä kneiffä :-) Chischtä um Chischtä isch ds Bier verschwunde und d Stimmig im Saal isch gstigä. D Zämästellig vo denä doofä Lütt isch einmalig gsi und hett die ganzi Party no viel witziger gmacht. Dr Doofheitsfaktor isch fasch nümme ds toppä :-)
Isla Santa Cruz:            14.10.2006 (BON ANNIVERSAIRE GRANDE-MAMAN!!!)
Ändlech isch dr Tag vo dä riesä Chrött abrochä; ds Markäzeichä vo dä Galapagos! Im Charles Darwin Research Center hei mir ds erschtä mau so am nä riesä Chrott id Ougä gluegt. Wow, das si Teils! Die Landschildchröttä chöi zwüschä 200 - 300 Kg schwär wärdä und überläbä locker jedes Mönschäläbä. Dr äutischt Chrott im Darwin Center isch über 150 jährig! Leider si einzelni Sortenä vo denä Schildchrött vom usstärbe bedroht. Beschts Bispieu daderfür isch dr lonely George. Vo derä Spezies gitts nur no ihn allei! Obschon är mit zwöi genetisch ähnlechä Wyblis zämäläbt, wott är sech eifach nid paarä. Stirbt dr berüehmt George, isch d Wäut um nä Tierart ärmer! D Schildchröt hei früecher dä Fischer und Piratä us Proviant dienet und si drum stark dezimiert wordä. Ou igfüehrti Tier, wie vor auem Geissä machä nä ds Läbä schwär. Sie frässä nä ihri Nahrig ab, und zertramplenä ihri Näschter. Glich hei mir sä am Namittag no i freier Natur chönnä erläbä. I dä rägnerischä Bärgä vo Santa Cruz (zum erschtä mau ä Tag ohni Sunne!) läbä di gröschtä Schildchröttä! Mir hei üsnä Ougä fasch nid trout! Zrügg ufem Schiff hei mir de leider müessä feschtstellä, dass di 14 nöie Lütt wo a Board si cho, keineswägs so gsellig druff si wie ihri Vorgänger! Aues einzu Sträber-Huschelis!!! Übrig si einzig mir und äs gselligs Aussie-Päärli (ou ä Steve und d Jessy; di zwöi hei mir bereits ds Vilcabamba troffä). Ou ä nöie Guide (Wilmer) isch derzuegstossä. Dä hingägä zieht dr "Doofheitsfaktor" wieder enorm id Höchi :-))) Mit sim china-nasalä-änglisch-Släng verstöh aui numä Bahnhof! Mit em Georgy zämä im Doppupack, si di zwe so nä richtigi Lachnummerä! Si löh äs Glier ab, und aues schint jetz sehr unorganisiert und nümme grad professionell! Nid mau uf di eifachschte Fragä findä si ä klari Antwort. Si wüssä z.B. nid so rächt, wo genau üsi Cruise ändet!? Uf d Frag "wie aut chöi d Schildchrött wärdä???" chunnt d Antwort: "ca. 300 Kilo" :-))) Aber gsellig si sie!
Isla Rabida/Chinese hat:                          15.10.2006
Bereits vorem z'Morgä i aller herrgottsfrüechi hei mir üsi Füess uf ä rot Sand vor Isla Rabida pflanzt. Idylle pur! Mit super Usblick uf Kaktüs, Strand, Seelöie, türkis Meer und Free Enterprise :-) Nach ärä churzä Witterfahrt zum nä Fels namens Chinese hat hei mir üs mit Schnorchu, Dress und Flossä ids klarä Meer gstürzt. Mir hei grad Glück gha; 5 Seelöie hei mir üs gspielt! Wild si sie um üs umäpfilet, uf üs zuegschwummä, hei ä Blick i üsi Toucher-Brüllänä gworfä und si im letschtä Momänt doch no abträit. So öppis cha mä wahrschinlech nur uf dä Galapagos erläbä!!! Dr absolut Hammer! Am Strand hett üs de no dr schönscht bishär gehnig Seelöi verzouberet und mi sogar no wöuä küssä :-) Wäg dä blödä Polit-Wahlä, hetts ä Programm-Änderig gä und mir hei zrügg nach Baltra müessä. Di ganzi Schiffs-Crew hett üs verlah, um ga ds wähle. Wär nid wählt, zaut ds Ecuador 5'000 USD! Somit steit am nä Wahl-Tag ds ganzä Land still, isch doch lächerlech! Ds Ersatzprogramm hei mir säuber kreiert. Nachdäm dr Märsu dr erscht Sprung ab em Deck hett gwagt, hei sech immer meh spingfreudigi derzuegsellt :-) Herrlech di Abchüehlig unger dr ecuadorianische Mittagshitz! Später isch üs de doch no einä mit em chlinä Böötli cho abholä, um üs am nächschte Strand abdsetzä. Dört hei mir üs wiederum allei müessä vertörle. Zrügg a Board, hei mir hungrig uf ds 2 Stund verspätete z'Nacht gwartet! Ds briefing (Infos für ä nächscht Tag) isch wieder mau vou amüsant gsi mit denä 2 Globies!!! Ächt scho fasch zirkusryf :-)
Isla Bartolome: und Isla Santiago:                            16.10.2006
D Isla Bartolome isch 100 % vulkanisch. Uf derä 5 Millionä Jahr jungä Insu gitts bis uf näs paar endemischä Pflanzä praktisch kei Vegetation. Ä herrlechä Usblick über d Lava-Felsä und ä ungloublech schönä Strand in sichelform (golden Beach) zierä Bartolome. Dr Sand isch würklech guldig und ds klarä Wasser hett einisch meh zum schnorchlä iglade. Sogar no Walä si uftoucht und di einti Gruppä (Karen und Al) hei sä mit em Böötli äs Stück witt verfolgt. Zum id Luft springä hei sie aber grad kei Luscht gha :-) Nachem z'Mittag hei mir di nächschti Insu; Santiago bsuecht. Dört si mir über näs schwarzes Lava-Fäud glüffä (Pa hoe hoe lava und A a a lava), wo hett usgseh wie Dünnsch...:-) Dr Strand hingägä hett üs bländet, so schneewiss hett är glüchtet! Zum schnorchlä ds absolutä Paradies, di Sullivan Bay! Hie hei mir wieder mit nöie Tier gschnorchlet: Weinmann's sisters mit em nä Pinguinli und mit em nä risä Hai (white tipped shark; Weissspitzenhai) und zahlrichä exotischä Fischlis. Ou dr Märsu hett no ä Blick uf dä 2 Meter Hai chönnä erhaschä. Dr Al-(fish) isch um nä Wasserschildchrötä und zwe gfährlechi Stachurochenä richer! Wieder zrügg uf dr Free Enterprise, hei mir dr romantisch Sunneungergang gnossä und dä zahlrichä riesä Manta's bi ihrnä freudigä Luftsprüng zuegluegt.
North Seymour:                  17.10.2006
D Free Enterprise Cruise geit leider scho am Ändi zue. Mir hei üs scho richtig guet igläbt uf derä Yacht und üs a die Dööflä gwöhnt. Vo Seechrankheit kei Spuhr! Während 8 Täg ständig bluttfuess ufem Schiff, mit Wind i dä Haar, äs gmüetlechs Butälä zum ischlafä, ds härzigä Holzenterieur, die spassigi Crew, die umwärfendi Tierwält, die wunderschönä Sandstränd i aunä Farbä und di täglechä Schnorchugäng im türkisch Wasser....Dr absolut Hammer!!! Was wott mä meh?! Us letschts Hightlight isch no North Seymour ufem Früehmorgäprogramm gstande. Die Insel der Frigate birds (red pouch frigates)! D Männli blasä wie nä riesä Ballon unger ihrem Chini uf, um dä Wyblis ds imponierä. Äs einzigartigs Spektakel!!! Ja, und jetz isch's leider ou scho Zyt worde um ds Schiff ds verlah. Wieder feschtä Bodä unger dä Füess! Ds Puerto Ayora hei mir när no chli dr Tag la usplampä. D Evääääls hei pennet und mir si no mau zu dä riesä Chrött :-) Strahlend blau und heiss isch's gsi!

Santa Cruz - Isabela:                   18.10.2006
Mit em ultra Schnäuböötli si mir vo Santa Cruz nach Isabela brätteret. Trotz riesigä Wäuä isch niemer vo üs seechrank wordä. Dr Al hett sogar no ä Orca gsichtet! Ds Isabela hei mir äs ruehigs Hotel diräkt am Meer gfunde; fernab vo aunä angerä Touris. So richtig zum Erholä! Uf Isabela liegt dr gröscht Vulkankrater vor Wäut seit mä, es chönnt aber ou dr zwöitgröscht si. D Meinigä gö usänang. Dä wei mir morn per Ross ga besichtige...
Isabela:                                  19.10.2006
Mit Palomo, Castania, PataPata und em Evil horse si mir im Schritt-Tempo di vulkanischi Hügulandschaft ufwärts grittä. Mir hei chönnä atriebe wie mir hei wöuä, aber trabet und galoppiert isch chum wordä! Mit angernä Wort, es si lahmi auti Göil gsi! Ds Wätter hett leider z wünsche übrig gla, und somit hei mir dr riesä Krater (7,5 x 12 Km) leider nid i voller Pracht gse. Glohnt hett sech das Usflügli aber trotzdäm! Ou bim Vulcana chico (dr chli näbädranne) hetts üs sehr gfaue. Rot-viollet-schwarzi Lava-Massä soweit das Auge reicht...ä Landschaft wie ufem Mond! Bim zrüggrittä si d Ross ufem rütschigä Bodä mehrmals fasch gstoglet. So hetts de doch no chli Action gä :-)
Isabela:                             20.10.2006
Nachem Rittä hei mir grad ä reeläx-Tag brucht! Usschlafe, abhänge, schnorchle, fein ässä....Im Dorf isch üs äs Galapagos Fläcki begägnet. So süess; im Fläcki-Muschter mit wuscheligem Haar :-) Zum erschtä mau ds Ecuador hei mir sitt langem wieder mau äs fetts BBQ veranstaltet. Im gmüetleche Hotelgärtli oder besser gseit "openair-Wohnzimmer" hett d Metal Attack üsi Ohrä verwöhnt und dr fein Chueh-Bratä üsi Göimä erquickt. Trotz oder viellech grad wäg derä deftigä Musig, hett no ä heiligä gwagt, üs äs Sektäblättli id Hand ds drückä. Im Nu hei mirs aber im Overall vom Hotelbsitzer la verschwinde :-)
Isabela:                   21.10.2006
Im Dorf hei mir dr Guide Joseph kennäglernt. Är isch üs bereits wärmschtens empfohle worde. So hei mir dänkt, bueche mir doch ou so nä Schnorchutrip wie d Estrella und dr Miguel Angelo. Di morglechi Frischi hett no nid so animiert zum schnorchle. Graui Wulkä und äs chüels Windli, brrrrrrr!!! Äs hett aber keis zrügg meh gä und mir si begleitet vom Spruch "you will survive" id Ungerwasserwäut gstochä! Dr Schnorchu-Usflug hett ghautä, was üs dr Joseph hett versprochä. Bunti Fischlis i aunä Farbä, diversi Stachurochenä, ca. 8 riesigi Wasserschildchröt, ä verspieltä Seelöi und zu guter letzt no ds "Hailight" Wissspitzähaie. Rudduwies! Leider hei sie chli Angscht gha vor üs, und sech drum  zwüschdürä i Höhlinä versteckt. Ds las tintoreras hett mä d Haie ou vom Land us super chönnä beobachte. Sie hei sech im nä Kanal umätummlet. Später hei sech die graue Wulkä ids schönschte Wätter verwandlet, so hei mir dr Räscht vom Tag am kilometerlängä Sandstrand gnossä und am Abä no äs letschts mau im beschte Restaurant (Islote) es mega Fischmenue vertrommet.
Isabela - Santa Cruz - San Cristobal:            22.10.2006
Ä längä Reisetag hett üs erwartet: Isabela - Santa Cruz - San Cristobal! Scho am Morgä am sächsi hei mir müessä ds Böötli verwütschä, um när ds Santa Cruz 6 Stund lang uf ds nächschte ds warte! Säubschtverständlech hett üs ds Isabela ds avisierte Taxi vergässä im Hotel abdshole. Da isch üs nur no übrig blibe, einä vom Hotel usem Schlaf ds topplä! Hei mir aber gärn gmacht, da mir di ganzi Nacht äs Saufgelage sinersitts hei müessä ertragä. Am Pier acho, hett scho dr erscht gchotzet; dr Eväl = Migräne! Ufem Boot isch's no im gröberä Stil wittergange. Dr Al hett ä richtigi Chotzparty agrissä und ds haubä Boot hett sech la mitriessä...Haubläbig ds Santa Cruz acho, isch üs aber no ä witteri Bootsfahrt uf d Insu San Cristobal bevorgstande. Die isch verhäutnissmässig de rächt glimpflech abglüffe :-) Ds San Cristobal hett üs scho d Melanie (Weinmann's-sistas-cousine) erwartet. Dr Zuefall hetts wöuä, dass ou sie zur gliche Zyt 3 Wuche uf dä Galapagos Ferie macht. Sie isch voll Ecuador-Fan und bereits zum 7. mau hie. Mir hei üs grad bi ihrer Gaschtfamile (Fausto, Piedad, Jairo und Jaime) chönnä iquartiere. Äs ganzes Huus für üs allei, incl. äs Hustier äs chlises Müsli! Vorem usgedehnte Spaghetti-Abä hett üs d Melanie Dorf und Husstrand (Playaman) zeigt.  Ds Dorf isch voller Plousch-Studies und Volontärä. Äs hett gmüetlechi Restaurants und Bars, wimmlet aber nur so vo Schwitzer und Amis!
San Cristobal:                          23.10.2006
Bereits vorem z'Morgä isch d Melanie vo ihrer süsch so nättä homestay-Muetter hochkantig us ihrem Zimmer gschossä wordä. Ds ecuadorianischä Müetti isch zu Höchschtform ufglüffä. Mit Bäsä und Puta-Gschrei, hett sie d Melanie us ihrem Hus verbannt! Grund: äs chlises Techtelmechtel mit em 24-jährigä Sohnemann Jairo! Si sie äch ds lutt gsi?! Derbi passä di zwöi so guet zämä und hei numä chli ufgfrüscht, was scho letscht Jahr isch gsi! Zum Glück hei mir im Hus gnueg Platz gha, und ar Melanie chönnä Asyl abiete :-) Ou San Cristobal hett ganz ä schöni Schnorchu-Bucht. Am Playa del Amor gset mä d Wasserschildchröt grad i Scharrä! Vor auem ds Schnorchlä mit denä riesä Panzer-Viecher spässlet sehr! Ds Nachtläbä isch auch nicht ohne uf San Cristobal. I dä zwöi härzigä Bars (Iguana Rock und Polos Bar) si mir wieder mau ids Bier gstoche...
San Cristobal:                   24.10.2006
Oh Schreck, äs tots Müüsli ir Chuchi!!! Hett ihm äch dr Märsu ds viel Spaghettis verfüetteret??? Bereits üsä letscht Tag uf San Cristobal isch abroche. Wiederum hei mir's üs am Strand gmüetlech gmacht und no äs letschts mau di riesä Marine-Turtles gnossä. Ä chlini Wanderig zum Ussichtspunkt, bevor sech d Sunnä mit em nä krönendä Sunneungergang hett verabschiedet. Ou isch's nachem z'Nacht langsam Zyt worde, sech vor Melanie ds verabschiede. Die isch de no chli dür d Bars zoge. Ufem Rückwäg hei mir no ganz äs speziells Tierli gsichtet: ä vierähaubbeinigi Chatz; endemic Spezies :-) Eis Bei isch überdimensional läng und total verträit gsi. Mir hei üsnä Ougä fasch nid trout :-)
San Cristobal - Santa Cruz:             25.10.2006
Ds einzigä Boot zrügg uf Santa Cruz isch bereits am Morgä am sächsi, 2 Stund verfrüecht über d Wäue gflitzt. Zum Glück hei mir geschter no d Zyt abklärt, uf üsem Billet isch nämlech Morgä am achti gstande! Mau ä ruehigi Fahrt ohni Gekotze, derfür mit Delphine!!! Wow, ganzi Delphin-Strassä hei sech im Meer vergnüegt. Wo mir üsä erscht Tag uf dä Galapagos hei verbracht, si mir ou am letschtä abghänget. Einä vo dä schönschte Stränd uf denä Inslä, d Tortuga Bay! Dr Kreis hett sech gschlossä...Grad wo dr Eväl dr Wilmer vor Free Enterprise Yacht hett nachägäffet, isch dä plötzlech uftoucht. Ou dr Georgy isch no derhärgradlet. Knappi 3 Wuche Galapagos (19 Täg) si keineswägs ds lang! Es gitt so viel Interessants ds gseh hie, das isch ächt ungloublech! Ds Paradies uf Ärdä...Vo au üsnä bsuechtä Inslä hett üs Espagnola am beschtä gfaue!

- Baltra (Flughafä)
- Santa Cruz (Tortuga Bay, Echsä, Chräbsä und ä wunderschöne, wissä Sandstrand)
- Southern Plaza (Vögu, Seelöie, Land Iguanas)
- Santa Fe (Seelöie, Galapagos Falkä und ä mystischi Abästimmig)
- Espagnola (Gardner Bay dr Hammerstrand mit wissem Sand und Seelöie üsä Favorit!!! Punta Suarez mit Blowhole und zahlrichä Seebvögu)
- Floreana (Flamingos, Sting Rays, ä einsami Häx läbt uf derä Insu, Prachtsmuschlä, Postoffice, Höhli und Devils Crown)
- Santa Cruz (Charles Darwin Research Center, Giant Land Turtles, nöii Lütt ufglade, Rägä)
- Rabida (Red Beach, Seelöie, Kaktüss, herrlechi Ussicht)
- Chinese hat (schnorchle mit 5 Seelöie, dr härzigscht, kussfröidig Seelöi)
- Santa Cruz (otra vez wäg dä blödä Polit-Wahlä, abgsetzt am Strand)
- Bartolome (Lavainsu mit golden Beach, super Ussichtspünkt uf d Vulkän)
- Santiago (Sullivan Bay, Lavaformationä, Hai)
- North Seymour (Frigate birds)
- Santa Cruz (Ändi vor Cruise)
- Isabela (4 Nächt, Vulkan, Haie, Rittä, Schnorchutrip, las tintoreras)
- San Cristobal (3 Nächt, Melanie, Wasserschildchröt, Playaman, Playa del Amor)
- Santa Cruz (Tortuga Bay, letschtä Tag)

13 Insle i 19 Taeg!!!

Baltra - Guayaquil zum viertä:                   26.10.2006
U scho si mir wieder ds Guayaquil glandet. Vom Naturparadies id Grossstadt! Wenigschtens hei mir ä churzä und ruehigä Rückflug gha. Leider reizt üs jetz Ecuador nümme so, nachdäm mir bereits ds Schönschte hei gse! D Galapagos si würklech nümme ds überträffä!!! No ä letschtä Stadtbummu mit dä Eväääls, bevor's am nächschte Tag hett gheissä Abschied ds näh. Für wie lang äch?!

Photos / videos of "Galapagos":