Choose another map, showing:

• Amazon
• South America (central)
• South America
• The World

Other entries in Nasca

Cusco-Ecuador

09.09.2006 - 19.09.2006

Cusco:                           09.09.2006
Nach so viel Idrück vom Manu und ärä riesä Fotofluet, hei mir üs no ä letschtä Tag uf Helmie's Camp gönnt. Wow, ganz allei si mir gsi. Nur grad dr Nino, Helmies tröier Schäferhund hett üs Gsellschaft gleischtet. Sogar dr Helmie hetts total gnossä nur üs us Gäscht ds ha :-))) Di Wiesä isch säutä so läär! Mau niemer wo jammeret, stört, blöffet und üs occupiert :-))) Obschon mir üsä Jaguar dä Dütschä Blöffsäck scho gärn hättä unger d Nasä griebä!

Ungerwägs:                        10.09.2006
Up and down and up.....! Mir si wieder on the road, richtig Nasca! Chum ds gloubä, die Höhemeter wo mä da macht. Vo 4'500 Meter uf schlussändlech 600 Meter Nasca. Ständig isch die kurvegi Strass wieder ufä und abä gange. Dr Horror für üsi Ohrä, wo wäg ärä starkä Erchäutig nid ganz buschtper si und drum knacksä und höllisch weh tüe!!! Wenigschtens isch dr Usblick uf d Vicunas, Viscachas, Lamas und Alpacas sehr schön gsi.

Nasca:                           nine/eleven
Früeh am Morgä si mir no ds letschtä Stück uf Nasca gfahre. 3 Täg vorhär no im grüenä Dschungu und jetz scho ir kargä Wüeschti!!! Ds Nasca acho, si mir wieder mau ids Internet gstochä. Welch eine Überraschung: äs Mail vo üsem Senile Schiffskolleg! Im Gägäsatz zu vielnä anderä, hett üs dä 85-jährig Päpu no nid vergässä!!! Pünktlech uf ä Novämber macht dr Neill no mau äs 2-monatigs Schiffsreisli mit Grimaldi und schwelgt i autnä Erinnerigä. Härzig!
Trotz nine/eleven hei mir üs hütt ä Flug gwagt! Die berüehmte Nasca-Linie us dr Vogu-Perspektive! Dr Märsu hett di kurvigä Turbulänzä voll gnossä, während sech bi mir dr ganz Magäinhalt hett säubschtständig gmacht! Sekli um Sekli hei sech langsam gfüllt...Im nä witnzigä 6-er Flügerli isch's 1/2 Stund über Wahl, Astronaut, Spinnelä, Condor, Kolibri, Papagei, Aff, Hund, Boum usw. gange. Es hett nid grad wenig gschüttlet und ipfercht si mir ou gsi ir hinderschtä Rheiä! U glich hett sech's glohnt, die Linie und Muschter us dr Luft ds erkundä. Wieder ufem Bodä, hett de dr Märsu ds Nasca so richtig Schries gha :-) D Froue hei nä umzwinglet und mit em Natel gfötelet!

Nasca - Huacachina:                     12.09.2009
Gitts ja nid!!!!!!!! Scho wieder si mir am morgä am sächsi vo rä dummä Sou usem Schlaf grissä wordä! Ufem nä riesä Parkplatz vor em nä läärstehendä Restaurant hei mir d Nacht verbracht. Vis-a-vis hei mir dr Flug buechet und drum ou ds Iverständnis vom Reisebüro-Chef gha dört ds übernachtä! U glich chunnt so nä frächi Morä und wott no Gäud am morgä am sächsi! Das isch ja wohl d Höchi! Natürlech si mir abghoue ohni ds zahlä und hei üs ou no grächt. Hei dr ganz Küder ufem Parkplatz entsorgt :-))) Ou d Hünd hei no ihrä Bitrag gleischtet und dr Küdersack usänang grisse...! Hie ds Peru chömä mir üs vor wie nä Milchchueh, wo mä nummä mälkt! Jedä wott für aues numä Gäud, keinä interessiert sech für Gringos, jedä starrt nur dumm! Schad eigentlech, landschaftlech isch das Peru auso würklech sehr schön!!! Fräch und dumm si sie leider aber fasch aui...Einzig d Manu-Crew isch bishär sehr flott gsi!
Z.b. hei mir im Supermarkt ca. für 30 Stutz igchouft und für aues nur äs miggrigs Säckli becho. Wo mir äs zwöits hei verlangt, hetts eifach stinkfräch gheissä: No!!!! Ou süsch ghört mä hie nie äs Merci we mä öppis ichouft oder zaut! Sie hei eifach kei Astand und gar nüt!!!!
So si mir ungewollt haut scho am Morgä am sächsi losgfahrä zum nä autä Inka-Friedhof (Cementerio de Chauchilla). Hie wimmlets nur so vo Mumie und Schädlä i aunä Variantenä us dr Inka-Zyt. Sogar dr Wüeschtä Bodä isch übersäit vo mönschlechä Überräschtä. Ä Oberschänku-Chnochä hett sech jetz i üsem Outo installiert :-) Witter isch d Fahrt nach Ica gnäuer gseit Huacachina gange. Ä Oasä ir rä Art Mini-Sahara...voller Sanddünä!

Huacachina (Ica):                         13.09.2006
Nachdäm mir no 2 Hardcore-Travellers hei kennäglernt, isch's ab id Dünä gange. Dr Belgier hett sech nach 4 Jahr um die ganzi Wäut reisä mit Töff und em nä erfolgrichä Buech uf holländisch (ik, Pan und die Welt) es jungs Girl vo Lima gschnappet und dr Schott Eduard isch ou scho jahrelang mit sim Velo ungerwägs. Am Morgä hei mir üs uf d Sockä gmacht und die höchä Sanddünä i Agriff gno. Das isch ä Steiss gsi. Ei Schritt fürä und zwe Schritt zrügg :-)
D Ussicht uf d Oasä Huacachina isch d Asträngig aber wärt gsi. Scho vo obä hei mir üs dr schönscht Swimming-Pool für nes erfrüschends Bädli usgsuecht. Herrlech, hie chöi mir sogar wieder mau badä! Gägä Abä hetts ds Abentüür Buggy-riding glockt! So öppis hei mir no nie erläbt, das isch dr Hammer gsi! Mit em nä Spezialgfährt (Sand-Buggy) si mir i eim Garacho über d Dünä gflitzt. Wie uf ärä riesä Achtibahn! Ufä, abä, Steilwand, Kurve...Isch huerä geil gsi!!! D Gägend mit dä riesä Dünä isch ou eimahlig und chunnt wahrschinlech dr Sahara nöch! Ou im Sandbordä hei mir üs no güebt. Isch aber grad so schwär wie im Schnee, zudäm knischterets när zwüschä dä Zähn! Nach em nä herrlechä Sunneungergang uf dä Dünä si mir de wieder ids Dorf gflitzt :-) Ds Liftgfüehl isch no mau vou zum Zug cho. Zwüschädürä si mir richtig i dä Gürt ghänget. "8-ti-Bahnfahre" isch aber zum Glück für üsi Mägä keis Problem...
Nach 2 Stund isch de dä Buggy-ride ds änd gange und mir hei üs uf üsä Parkplatz verzogä, wo üs ändlech mau niemer gweckt hett!

Paracas und Islas Ballestas:                    14.09.2006 - 15.09.2006
Nur ganz äs chlises Stück Fahrt, und scho gitts di nächschtä Sehenswürdigkeitä ds betrachtä: Paracas! Vom Dschungu id Wüeschti und ou ändlech wieder mau ads Meer! Ne frische Meeresbrise hett üs ds Paracas in Empfang gno. Wiedermau si mir umschwärmt gsi vo Typä, wo üs ä Trip uf d Inslä vis-a-vis hei wöuä verchouffä! Mir hei üs grad äxtra für ä wenigscht Ufdringlechscht entschiedä! Morn am morgä am achti geits los uf d Islas Ballestas, ab ids Vogu-Paradies. Am Nami hei mir no gmüetlech Zyt gha, ds Naturreservat Paracas ds erkundä. Ä dünischi Halbinslä am wildä Pazifik mit schönä Felsformationä und vielnä Seevögu. Sehr schön, aber ou sehr windig...Hett wieder mau stark ad twelfe appostles im Aussie-Land erinneret :-) Genau hütt vor 5 Jahr si mir ds Darwin glandet....
Vo Paracas us isch's mit em High-speed Boot nur 1/2 Stund zu dä Islas Ballestas. Es wahrs Voguparadies! Scho mau ä chlinä Vorgschmack uf d Galapagos. Nur no 3 Wuche trennä üs vom Rendez-vous mit dem "Bösen" :-) The evääääls stattä üs nämlech äs Bsüechli ab. Yeahhhhhh!!!! 3 Wuche Seevögelis, grunzendi Seelöie, riesä Echsä-und Schildchröt, Vulkän und natürlech Karen und Al höchschtpersönlech...Isch subi, wagt ändlech mau öpper dr Flug überä Teich und leischtet üs Gsellschaft! Das wird spassig :-) So, zrügg zu dä Islas Ballestas: Die beheimatä die gröschti Seevogupopulation wäutwit. Krass, ganzi Hüglä si schwarz vo Vögelis und es zwischteret und schisst vo überau! Ou Seelöie si dört zu 1000-igschte vorhandä. Mä schmöckts scho vo wittem! Für dä 2 stündig Usflug hei mir wieder mau ä Trip buechet und natürlech isch o wieder mau öppis schief gange! Mir si ja schliesslech ds Peru :-) Obschons äs mega Schnäuboot isch gsi, hett de dr Rückwäg chli länger duret: Ds Bänzin isch usgange!!! Tja, wieder mau hei mir chönnä warte uf näs angers Boot, wo nöis Bänzin hett bracht. Si fahre zwar jedä Tag uf di Inslä, aber wie mä gseht, gitts ds Peru überall unfähigi...Am Nami isch de ds Pisco no ä 5 stündigi Internet-Üebig ufem Programm gstande. Krankekasse-Verlängerig und update hett sech beides us sehr kompliziert erwiese. Ä Gratis-Homepage isch ou numä bedingt gratis!!!
 
Ungerwägs richtig Equador:            16.09.2006 - 19.09.2006
Die längi Fahrt dür eini vo dä grüsigschte Stätt vor Wäut (Lima) hei mir ou überstande! Dr ganz Tag nur Näbu, Smog, Gehupe, Chaos, Gstank...ä trischti Gägend!!! Ou süsch hett dä gsamt Küschtäabschnitt (ca. 1500 Km) absout nüt ds bietä! Ersch wo mir wieder chli id Bärge si gfahre, hei mir d Sunnä churz vor Sunneungergang wieder mau gseh. Dört hett üs zum erschte mau di peruanischi Polizei ufghautä. Mir hei üs äxtra dumm gsteut und nur änglisch gschnurret. Dr Tschugger hett gmeint: Aha cruz rojo, vom rotä Chrüz sitt dir! So hei mir nid mau müessä dr Uswis zeigä :-) Das Trickli müessä mir üs merkä für näs angers mau! Üses CH-Chrüz glicht haut gar am rotä Chrüz :-)
Huaraz, ds Trekkinggebiet Nr. 1 vo Peru liegt uf 3'500 Meter Höchi. Da mir aber nid schön Wätter hei gha, hei mir's de mit Wanderä grad la si. D Umgäbig rund um d Cordillera blanca (Schneebärgä) soll sehr schön si, gseh hei mir uf dr Durchfahrt nid viel meh aus 1 Gipfu! Dr räscht hett sech i Wuklä ghüllt. Derfür si mir wieder mau ä nicht-mehr-enden-wollende-Strass talabwärts gfahre. Dür 37 Tunnels ischs über näs ehemaligs Bahntrasset Kurva um Kurva a rä steilä Schlucht entlang ids Tal gange. Stundelang si mir gfahre und es isch scho fischter wordä. Da mir ds Peru si, hei mir leider nid eifach im Nichts chönnä pennä! Ersch spät ir Nacht hei mir äs Dörfli erreicht. Verpasst hättä mir eh nid viel, i derä sprödä und kargä Gägend. Ou am nächschte Tag isch's grad trischt wittergange. Näbu und Dunscht so weit das Auge reicht! D Stadt Trujillo hett nid grad allzuviel ds bietä. Einzig di farbigi Plaza heiteret ds ganze no chli uf! Süsch: Verchehr, Chaos, Gehupe...wie gehabt! Trujillo isch bi dä Touris berüehmt, für die verschiedeni Ruinä-Städt rundum. Z.b. Chan Chan, die gröschti! Chan Chan hei mir üs vo ussä agluegt, und bim Ablick dr Itritt grad chönnä sparä! Lehmruinenä hei mir ja bereits am Meter gse ds Peru. Di si ja überau!!! Ds Meer hett de da scho meh glockt. Hie hei mir wieder mau äs paar Sunnestrahle chönnä tanke. Ds Dörfli Huanchaco isch bekannt für sini chlinä, Einmann-Fischerböötli us Schilf. Ou isch's äs Surfer-paradies. Badä im Meer liegt wägem chautä Humboldtstrom leider immer no nid drinn! Äs isch arschchaut.
Uf ärä Tankstell im Zäntrum vo Trujillo hei mir di ganzi Nacht nid grad viel pennet!!! Derfür hei mir nach längerer Zyt wieder mau ä Supermarkt gfunde, wo aues hett bottä! Nachdäm mir üs am Morgä no sogenannti Mocha-Pyramide hei wöuä inäzieh (heis aber när glich la si), da si vo ussä nid grad vielversprächend hei usgseh, isch's panam-mässig ufwärtsgange. Ä ödi, graadi Strecki dür d Wüeschti. Einä vo dä längwiligschte Täg uf üsere ganzä Reis!
Dr "Höhepunkt" hetts de aber ds Chiclayo gno: Vor Panam si mir diräkt ir allergröschte Abfallmuldä ds Mitts im nä Wohnquartier glandet! So öppis Schäbigs isch üs nid mau ds Afrika begägnet!!! Wo mir hei härägluegt nur no Abfäll! Geyer's si fliessig am durchstöbere gsi! Bääääähhhh, Dräck Dräck Dräck mehhhhh Dräckkkkkkk!!!!!!!! Panamericana fahre isch nid grad billig! Für di gruusigi Strecki Lima-Talara (ca. 1050 Km) hei mir bereits meh zaut, aus äs ganzes Jahr uf Schwitzer Outobahnä! Gägäleischtig hei mir bis uf nä Teerstrass keini gse! Z.b. Übernachtigsplätz uf Tankstellä od. Restaurants findet mä fasch keini hie! Ou mir Wägwieser hei sie's nid so. Churz gseit: Peru räntiert sech würklech nid mit em Outo! Besser geit mä 3-4 Wuche nur d Hightlights mit em Bus ga abklapperä und verschwindet wieder...
Gägä Abä hett sech ändlech d Sunnä wieder mau zeigt und di kahli Wüeschtä-Landschaft hett sech churz i näs tropisch's grüen verwandlet; mit Rysfäuder und Palma. Ou d Lütt schinä im Nordä vo Peru ändlech wieder chli fründlecher ds si! Sie hei plötzlech wieder Fröi a üsem Guschti und si interessiert vo wo mir chömä. Ou we mir nachem Wäg frage, gäbä sie sech richtig Müeh bim erkläre...

Add to del.icio.us Add to reddit

Photos / videos of "Cusco-Ecuador":